შაბათი, სოციალური მედია

შაბათი დღე ძალიან მიყვარს და  არასდროს ვუძღვნი რაიმე აზრიან საქმიანობას. უბრალოდ დღის განმავლობაში სულ სახლში ვარ, პიჟამოთი ვბოდიალობ, ყავის ჭიქებით ჩემს ადგილებს ვნიშნავ და მეილებს ვპასუხობ.

მეორე ოთახში დედაჩემის და მამაჩემის მოსწავლეები მოდიან და მიდიან. სათვალავი მერევა ხოლმე, იმდენი არიან.  ყველას უნდა, რომ  ქიმია და მათემატიკა იცოდეს _ სხვანაირად ატესტატს ვერ მიიღებენ. მე კიდევ ფეხებზე მკიდია მათი სასკოლო და ერთიანი ეროვნული გამოცდები. მე მინდა, რომ იმ ოთახში გავიდე, დიდ ტელევიზორში ფლეშკა შევარჭო და რამე კარგ ფილმს ვუყურო ბატიბუტის თანხლებით. მაგრამ ვინ გაცლის კარგ ცხოვრებას. ამიტომ კომპთან ვზივარ და ვწერ, რა მინდა.

ერთ დროს მეც მყავდა მოსწავლეები ქართულში. პირველ კურსზე ვიყავი და ჯიბის ფული მჭირდებოდა. ძალიან ბევრჯერ მიმიტოვებია უნივერსიტეტთან ლუდის სმა და მათთან გავქცეულვარ. მერე ერთად დავმსხდარვართ და გვისაუბრია სკოლაზე, მასწავლებლებზე და ქართულ ლიტერატურაზე.

ხანდახან მენატრება ხოლმე ის დრო. რატომაც არა. ახლაც ვიქნებოდი რეპეტიტორი, მაგრამ ქართულის ნაცვლად ბლოგინგში:  ჩემთან მოვიდოდნენ ახალგაზრდები, რომლებსაც ვასწავლიდი ბლოგის შექმნასა და წარმოებას. ვასწავლიდი სწორ ბრენდინგს, პატარა მარკეტინგულ ხრიკებს და ისეთ მნიშვნელოვან რამეებსაც, როგორიც, მაგალითად, პუნქტუაციაა.  ძირს ბევრ პუფს დავდებდი, ატმის  წვენს ჩამოვურიგებდი ჭიქებით  და შევუდგებოდით მუშაობას ჩვენ_ჩვენს ლეპტოპებში. კენჭისყრით ავირჩევდით თემას, გვექნებოდა დისკუსია და ერთ საკითხზე ბევრ სხვადასხვანაირ პოსტს დავწერდით. ამას მოყვებოდა ერთმანეთის ნაწერის გარჩევა და შენიშვნები. ბოლოს კი _ პუფებზე გადაწოლა და ჭორაობა.  გასაგებია, რომ ეს ურთიერთობის მოძველებული ფორმატია, მაგრამ რა ვქნა, ასე მირჩევნია. მიყვარს, როცა ინტერნეტსა და ადამიანურ ურთიერთობებს ერთმანეთს ვუკავშირებ.

ინტერნეტისა და ადამიანების კავშირზე გამახსენდა. ამ ბოლო დროს რამდენიმე ბლოგს ვკითხულობ, რომელთა ავტორებსაც სიამოვნებით გავიცნობდი. თითოეული მათგანი გამორჩეული, თვითმყოფადი და საინტერესოა. ისინი არც სოციალური მედიის ექსპერტები არიან და არც უსაქმურები. მათ უბრალოდ სურთ, რომ საკუთარი სახლი ჰქონდეთ ინტერნეტში _ სახლი, რომლის სიმყუდროვეც გადამდებია.

მაშასე:

1. ბაბისა

_ ამ ბლოგზე ყველაფერი მშვენივრად იკითხება კულინარიული რეცეპტებით დაწყებული უბრალო ამბებით დამთავრებული. რაც მთავარია, ყველა ფოტოს განწყობა მოაქვს.

2. ქენდი

_ მე მომწონს ქენდი. ისეთ რამეებზე წერს, რაც მე ხშირად მრჩება ხოლმე თვალთახედვის მიღმა. ხანდახან კი ძალიან ზუსტი და ემოციურია (მაგალითისთვის იხილეთ ეს პოსტი )

3. ნათიკუდა

ამ ბლოგზე რომ მოვხვდი, ისე გადავდიოდი გვერდიდან გვერდზე, რომ ვერც კი დავაფიქსირე, რამდენ ხანს შემოვრჩი. ყველაფერი ძალდაუტანებლად გამოსდის და მრავალფეროვანი პოსტები აქვს. მომწონსმომწონსმომწონს

სხვა ბლოგებზე სხვა დროს იყოს.